2001 թվականի դեկտեմբերի 17-ին, ռեժիսոր Հրանտ Մովսիսյանի առաջարկությամբ, ստեղծվեց «Բաց դռների օր» ծրագիրը։ Դավիթ Վարդանյանը և տեսախցիկը այցելում էին պատահական երևանցիների բնակարաններ։ Հայկական հեռուստատեսությունում նախադեպը չունեցող այս ծրագրի ընթացքում հեռուստաեթերում բացահայտվում էին սովորական քաղաքացիների տները։ Յուրաքանչյուր կիրակի Դավիթը այցելում էր մինչև 10 բնակարան և ծանոթանում տան անդամներին, նիստուկացին ու խնդիրներին։ Սակայն այդ ամենը շատ դժվար էր իրականացնել միայնակ, և օգնության եկավ դերասան Ստեփան Ղամբարյանը։ 2002 թվականի մարտի 1-ին, Ստեփան Ղամբարյանին փոխարինեց Սուրեն Շահվերդյանը։
Հաղորդումը վերանվանվեց «Նրանք մեզ չէին սպասում», իսկ հետագայում՝ «Չէին սպասում»: 2010 թվականի հունվար ամսին, երբ «Չէին սպասում» հաղորդումը հյուրընկալվել էր Էդգար Ռոստոմյանին, Սուրեն Շանհվերդյանը առաջարկեց իր ընկերոջ՝ Հայկ Սարգսյանի, միտքը փորձել ի կատար ածել՝ այն է անսպասելի ներխուժելով հանրաին մարդկանց տուն որևէ ուտեստ պատրաստել, սառնարանում առկա մթերքներով: Սակայն… նկարահանելով փորձնական հաղորդում, պարզ դարձավ, որ այն անհնար է վերածել 50 րոպե տևողությամբ հեռուստահաղորդման։
Հետագայում, Դավիթ Վարդանյանի հեղինակությամբ և «Հայկական երկրորդ հեռուստաալիք»-ի գլխավոր պրոդյուսեր Կարեն Հակոբյանի աջակցությամբ, ստեղծվեց «Քաղցած Չէին սպասում» հաղորդման վերջնական ձևաչափը, որը սկսեց եթեր հեռարձակվել 2010 թվականից՝ «Հ2» հեռուստաընկերությամբ։ «Քաղցած Չէին սպասում»-ը դարձավ «Չէին սպասում» հաղորդման տրամաբանական հավելում։
2024 թվականի դեկտեմբերի 8-ից «Չէին սպասում» և «Քաղցած Չէին սպասում» հաղորդումների վարողը դարձավ դերասան Վահան Միրաքյանը։
2025 թվականի մայիսի 11-ից «Չէին սպասում» և «Քաղցած Չէին սպասում» հաղորդումները դադարեցին հեռարձակվել հեռուստատեսությամբ և հասանելի դարձան միայն www.cheinspasum.am կայքում և Davit Vardanyan YouTube-յան ալիքում։